Упершыню дзень нараджэння знакамітай ураджэнкі Бярозаўскай зямлі Ніны Мацяш, паэтэсы, перакладчыцы, аўтара кніг для дзяцей, лаўрэата Літаратурнай прэміі імя А.Куляшова, Міжнароднай прэміі імя Р.Скаварады, творча адзначаны Бярозаўскім гісторыка-краязнаўчым музеем. У яго філіяле – Галерэі мастацтваў, дзе дзейнічае выставачная экспазіцыя “Вытокі літаратурнага майстэрства”, адбылася сутрэча навучэнцаў школ горада і настаўнікаў-беларусазнаўцаў, мясцовых паэтаў, прыхільнікаў беларускага слова з літаратарамі з Мінска, Брэста, якія зналі, сябравалі з нашай славутай зямлячкай.
Ніна Матяш пайшла ад нас у 2008 годзе, але яе вершаваны радок “Мы стрэнемся, хоць нас ужо не будзе…” ажывае сёння фотаздымкамі, кнігамі, асабістымі рэчамі на стэндзе экспазіцыі і ў экскурсах-аповедах аб яе пакутным лёсе і творчай спадчыне.
Дырэктар музея Таццяна Леванюк звярнула ўвагу прысутніх на тое, што музейнае мерапрыемства ў Бярозе пашырае рамкі традыцыйных паэтычных чытанняў “Бабіна лета ў Белаазёрску”, якія праходзяць штогод 20 верасня менавіта ў дзень нараджэння Ніны Мацяш, і прадставіла паважаных гасцей.
Беларускі паэт Міхась Скобла зазначыў, што успаміны пра Ніну Мацяш заўсёды светлыя, і сённяшні прыгожы дзень – гэта таксама дарунак Ніны, каб было сонечна у душах тых, хто ўдзельнічае ў літаратурнай сустрэчы, хто успамінае яе, хто чытае яе вершы, спявае яе песні.
Літаратурную гасцёўню у музеі, прывечаную светлай памяці вядомай беларускай пісьменніцы, ураджэнкі Бярозаўскага краю, Ніны Мацяш упрыгожыла музычнае выступленне спявачкі з Мінска Таццяны Грыневіч, яна песняй пад уласны акампанімент на гітары данесла да слухачоў цудоўныя паэтычныя творы Я.Купалы, М.Багдановіча, беларускую народную песенную спадчыну.